ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានបញ្ជាទៅរដ្ឋមន្ត្រីក្រសួងធម្មការ និងសាសនា ឱ្យប្រជុំជាមួយនឹងថ្នាក់ដឹកនាំសាសនាទាំងអស់នៅកម្ពុជា ពិនិត្យឡើងវិញទៅលើភាពត្រឹមត្រូវ និងមូលដ្ឋាននៃសាសនាទាំងអស់។

ការបញ្ចានេះគឺបន្ទាប់ពីសម្ដេចមើលឃើញថា មួយរយៈចុងក្រោយនេះមានមនុស្សជាច្រើនបានតាំងខ្លួនជាព្រះ ជាអ្នកមានបុណ្យ បង្កភាពវឹកវរនៅក្នុងសង្គមជាច្រើន។

ថ្លែងនៅក្នុងពិធីបិទសន្និបាតក្រសួងបរិស្ថាននៅរសៀលថ្ងៃព្រហស្បតិ៍ ទី២១ ខែធ្នូ ឆ្នាំ២០២៣នេះ សម្ដេចធិបតីបានចាត់ទុកភាពរញ៉េរញៃនៃសាសនាដែលគ្មានមូលដ្ឋាន ថាបានប៉ះពាល់ទៅដល់បរិស្ថានសង្គមយ៉ាងធ្ងន់ធ្ងរ។ សម្ដេចថាសេរីភាពនៃសាសនាកម្ពុជាគោរពក៏ប៉ុន្តែមិនគួរណាសេរីភាពដែលគ្មានមូលដ្ឋានច្បាស់លាស់ធ្វើឲ្យប៉ះពាល់ទៅដល់តម្លៃសង្គមនោះទេ។

សម្ដេចថា៖ «សុំឱ្យពិនិត្យមើលរាល់ការធ្វើសកម្មភាពផ្សេងៗត្រូវមានមូលដ្ឋានច្បាស់លាស់ឬអត់? រាល់ជំនឿដែលគ្មានមូលដ្ឋានច្បាស់លាស់សូមពិនិត្យឡើងវិញ»។

ជាមួយគ្នានេះសម្ដេចក៏បានបញ្ជាទៅកាន់រដ្ឋមន្ត្រីក្រសួងយុត្តិធម៌ឲ្យចូលរួមនៅក្នុងករណីនេះផងដែរ៕